سوالف

كــــل عــــام وانـتوا بخـير

وكــل عام وأهــل الكويت بخير

وكـــل عام وديرتنــا الغاليه بألف خير

يوميـــــــــــــــــــــــــاتي

يوم الأحـــــــد

وانا طالعه مع رفيجتي نتمشى بالغلط طلعنا على شارع الخليج

طبعا الدوريات فلللللل عند كل اشاره قريه من الدوريات

وقفنا عند الاشاره والا علم طايح تقريبا تقريبا قريب من الدوريه

طبعا انا عيوني طاحت عليه وحدي انقهرت والاشاره شوي وتبطل

قلت اللي فيها فيها نزلت وشلت العلم من الارض واسمع طاااااااااااااااااط

طاااااااااااااااااط رفيجتي تقول خلصيني والله صعدت السياره وقلبي متقطع

العلم ماكو سياره مو دايسه عليه ومتقطع :((((

والازدحااااااامات واي واي وانا حدي خايفه كل شوي اشوف الباب

مسكر والا لا اخاف احد يبطله ويرشني واصير بابا نويل

بس الحمد لله ما حاشنا ولا شي انحشنا

رحنا سوق المباركيه وشريت كل شي على علم الكويت حتى شباصات ;p

المهم رديت البيت والا امي جدامي اشوفها تتحلطم

والا مخالفين اخوي عشان سيارته مظلله

وطبعا اخوي اكيد ماكو مسيره باجر ;p

الوالده بدعت خذت مفتاح سيارته

-------------------------

طبعا انا قاعده اليوم فبيت رفيجتي

والا الحريم يتحلطموون

الاولى تقول وين قاعدين الشباب يرقصون

الثاني تصفق وتقول اي والله حتى البنات ينزلون من السياره ويرشون هذا الفوم

المفرووض ماكو مسيره

جان اقول لهم

ليش يبا العيد الوطني حق الكبير ولصغير

حق البنت والولد

وهذه عيد الوطني والتحرير والكل يفرح

مو عاجبهم كلامي مصممين ما يبون مسيره

مع ان انا اشوف ان وايد وناسه لكويت كلها تلتقي بشارع واحد

وفرحتنا وحده

انا مارحت المسيره :(ولا شفت شي يقولون المسيرات بصبحان؟؟

صج؟؟رحتوا والا لا؟؟

ادري قرقت قلت اغير مجال السياسه وادخل بالوناسه شوي

اتمنى لكم اجازه سعيده وعيد وطني اسعد انشالله

strawberry